2025 жылдың 1 қыркүйегі дүйсенбіге сәйкес келгенімен, бұл күн Конституция күніне байланысты демалыс ретінде белгіленді. Осылайша, қазақстандықтар 30, 31 тамыз және 1 қыркүйек күндері қатарынан үш күн демалатын болды.
Бұл туралы Оқу-ағарту министрі Ғани Бейсембаев Үкімет отырысынан кейінгі брифингте мәлімдеді.
Министрдің айтуынша, 1 қыркүйек – елімізде білім күні ретінде аталып өтетін маңызды дата. Алайда ол кейде демалыс күндеріне сәйкес келіп жатады. Осындай жағдайларда шешімді педагогикалық кеңестер қабылдайды.
«Педагогикалық кеңес мүшелері жаңа оқу жылын ресми түрде 2 қыркүйектен бастау жөнінде шешім қабылдады. Дегенмен, алғашқы қоңырау – бірінші сынып оқушылары үшін аса маңызды, символдық сәт. Сондықтан тек бірінші сыныпқа арналған алғашқы қоңырау 1 қыркүйек күні өткізіледі», – деді Ғани Бейсембаев.
Осылайша, 1 қыркүйекте тек бірінші сынып оқушылары үшін салтанатты шара өтеді. Ал еліміздегі барлық мектептерде оқу процесі ресми түрде 2 қыркүйекте басталады.
