Зерттеу әдістемесі бірыңғай уақыт белдеуін енгізудің халық денсаулығына, энергия тұтынуға, еңбек өнімділігіне, оқушылардың үлгеріміне, жол-көлік оқиғаларының жиілігіне, қылмыс деңгейіне және басқа да маңызды аспектілерге ықпалын бағалау үшін 40-тан астам метрика мен көрсеткіштерді қамтыды.
«Денсаулық сақтау саласы бойынша зерттеуге қала және ауыл тұрғындары, сондай-ақ әртүрлі жастағы азаматтар тартылды (әр 100 мың адамға шаққанда есептелді). Энергия тұтыну тұрғысынан ел бойынша электр қуатын тұтыну статистикасы, оның ішінде ең жоғары жүктемелер мен жалпы электр тұтыну көлемі салыстырылды. Еңбек қызметіне қатысты орындалған жұмыстардың көлемі, жұмысқа кешігу, сабаққа келмеу, жарақат алу және тәртіп бұзу жағдайлары зерттелді. Алынған нәтижелер бірыңғай уақыт белдеуіне көшудің халықтың өмір сүру деңгейіне кері әсер етпейтінін көрсетті», – деп түсіндірді Арман Шаққалиев.
Үкімет басшысы бұл мәселе бойынша Парламент Мәжілісімен бірлесіп, тиісті жұмыстарды ұйымдастыруды тапсырды.
«Мемлекет басшысы Үкімет пен Парламентке бұл мәселені жан-жақты қарастырып, оңтайлы шешім қабылдауды тапсырғанын білесіздер. Министрдің баяндамасында көрсетілгендей, жүргізілген мониторинг бірыңғай уақыт белдеуін енгізу туралы шешімнің жағымсыз әсері жоқ екенін дәлелдеді», – деді Олжас Бектенов.
