Тиісті жарлыққа мемлекет басшысы Қасым-Жомарт Тоқаев қол қойды. Бұл туралы бүгін, 2025 жылдың 17 ақпанында Ақорда сайтына жарияланды.
«- Берік Уәли Абай облысының әкімі болып тағайындалсын, ол бұрынғы атқарған лауазымынан босатылсын», — делінген хабарламада.
Берік Уәли — 1977 жылы Семей облысында дүниеге келген.
Т.Жүргенов атындағы Қазақ мемлекеттік театр және кино институтын «Кинотанушы», Әл-Фараби атындағы Қазақ ұлттық университетін «Журналистика» (магистратура), сондай-ақ Қазақ инновациялық гуманитарлық-заң университетін «Құқықтану» мамандықтары бойынша бітірген.
Еңбек жолын 1997 жылы «Таң» телекомпаниясында «Алматы жаңалықтары» ақпараттық бағдарламасының тілшісі болып бастаған.
2023 жылдың 12 қыркүйегінде Мемлекет басшысының өкімімен Қазақстан Республикасы Президентінің Кеңесшісі – Президенттің Баспасөз хатшысы лауазымына тағайындалған болатын.
«Дарын» мемлекеттік жастар сыйлығының (2011); «Құрмет» орденінің (2019); ҚР Президенті Алғысының (2021); ҚР Президенті Әкімшілігінің «Мінсіз қызметі үшін» төсбелгісінің (2022) және 5 мерекелік медальдің иегері.
