Қазақстан Республикасының Бас прокурорының орынбасары Жандос Өміралиев қазақстандықтарға үндеу жасады, бұл үндеу ведомствоның ресми сайтында жарияланды, деп хабарлайды alataunews.kz.
2024 жылғы 6 қазанда республикалық референдум өтеді, онда «Сіз Қазақстанда атом электр станциясының салынуына келісесіз бе?» деген сауал қойылады. Референдумның өткізілуі «Республикалық референдум туралы» және «Қазақстан Республикасындағы сайлау туралы» Конституциялық заңдарға сәйкес реттеледі.
Қоғамдық пікірді зерттеу заңға сәйкес тіркелген, бұл салада кемінде 5 жыл тәжірибесі бар ұйымдар арқылы жүргізілуі тиіс. Нәтижелерді дауыс беруге 5 күн қалғанда жариялауға тыйым салынады.
Қазірге дейін заңсыз қоғамдық пікір зерттеулерінің 8 дерегі анықталған. Прокуратура 4 азамат пен 2 заңды тұлғаны әкімшілік жауапкершілікке тартқан.
Референдумға қатысты үгіт-насихат жұмыстары 2024 жылғы 4 қазанға дейін жүргізіледі. Ал 5-6 қазан күндері үгіт жүргізуге қатаң тыйым салынады.
Прокуратура заң бұзушылықтардың алдын алу үшін азаматтарды заң талаптарын қатаң сақтауға шақырады.
