«Республикамызда коронавирус инфекциясы бойынша эпидемиологиялық жағдай тұрақты. Барлық өңірлер «жасыл» аймақта. Тәулігіне коронавирустың 70-ке дейін жағдайы тіркеледі. Науқастардың 99 пайызы емделген. Коронавирус инфекциясы бойынша тұрақты эпидемиологиялық жағдайға қарамастан, қазіргі уақытта жіті респераторлық вирустық инфекция мен тұмаудың эпидемиялық маусымы басталды», — деді вице-министр бүгін Орталық сайлау комиссиясының отырысында.
Айжан Есмағамбетованың атап өтуінше, олардың таралу жолы коронавирус инфекциясымен бірдей, яғни ауа-тамшы жолымен беріледі.
«Осы жылғы эпидемиологиялық маусымның басынан бері республикамызда тұмаудың 1 014 зертханалық расталған жағдайы тіркелді. Республикада тұмаудың А және Б вирусының айналымда жүргені анықталды. Бұдан басқа бүгінгі күні 1 миллионнан астам ЖРВИ тіркелді. Сырқат адамдар саны өткен жылдың осы кезеңімен салыстырғанда бірдей деңгейде. Ауырғандардың 60 пайызы – 14 жасқа дейінгі балалар», — деді ол.
