Тамыз айында елімізде жылдық инфляция баяулап, 8,4%-ды құрады (шілде айында бұл көрсеткіш 8,6% болған). Жылдық инфляция сегіз өңірде төмендесе, тағы сегіз өңірде керісінше қарқын алған, ал төрт өңірде өзгеріссіз қалған, деп хабарлайды alataunews.kz.
ҚР Ұлттық банкінің мәліметінше, ең жоғары жылдық инфляция Астана қаласы мен Маңғыстау облысында тіркелген.
«Азық-түлік тауарларының бағасы тамыз айында жылдық көрсеткіш бойынша 5,5% деңгейінде қалды (шілдеде де 5,5%). Бұл топтағы тауарлардың ең жоғары бағасы Алматы қаласында (8,3%), ал ең төменгі өсім Түркістан облысында (3,0%) байқалды», – делінген хабарламада.
Азық-түлікке жатпайтын тауарлардың бағасы 7,7%-ға дейін өсті (шілдеде – 7,3%). Ең жоғары өсім Маңғыстау облысында (13,0%), ал ең төменгі өсім Алматы облысында (5,4%) тіркелген. «Ақылы қызметтер бағасы тамызда 13,6%-ға дейін баяулаған (шілдеде 14,5%). Павлодар облысында бұл көрсеткіш 18,9%-ды құрап, республикалық орташа деңгейден айтарлықтай жоғары болса, Алматы облысында өсім 7,7%-ды құрап, ең төменгі деңгейде болды», – деп нақтылады Ұлттық банк өкілдері.
Тамыз айында еліміз бойынша айлық инфляция 0,6% болды, бұл көрсеткіш тарихи орташа мәннен жоғары (2017-2021 жылдардағы тамыз айында – 0,2%).
