Алматы облысының және бүкіл Қазақстанның агроөнеркәсіптік кешенін дамыту деңгейі азаматтарымыздың әл-ауқатына тікелей әсер етеді.
«Геосаяси турбуленттілік және жаһандық экономикадағы дағдарыстың күшеюі әлемдегі инфляциялық қысымды күшейтеді. Бұл әсіресе азық-түлік нарығында сезіледі», — деді ҚР Президенті тұрғындармен кездесу сәтінде.
Мемлекет басшысының ақпаратына қарағанда, қыркүйек айында біздің еліміздегі инфляция 17%-дан асты және қазірдің өзінде өсу дерегі тоқтаған жоқ. Бұл азаматтардың нақты табысының төмендеуіне әкеледі. Бағаның өсуіне негізгі әсер етуші фактор — азық-түлік инфляциясы, ол 20 пайызға жетті.
«Бұл көбінесе импорттық азық-түліктің қымбаттауына байланысты. Біздің импортқа тәуелділігімізді азайту үшін 2024 жылға дейін азық-түлік қауіпсіздігін қамтамасыз ету жоспары қолданысқа енгізілді. Мемлекет форвардтық несиелеуге 100 миллиард теңгеден астам қаржы бөлуді жоспарлап отыр. Бұл фермерлерге көктемгі егіс жұмыстарын уақтылы жүргізуге және күзде өнімді кепілді өткізуге мүмкіндік береді», — деді Қасым-Жомарт Тоқаев.
Сонымен қатар ол көп жағдайда азық-түлік бағасының өсуіне делдалдар түрткі болатынын айтты.
«Дүкен сөрелеріне шықпас бұрын, өнімдер бағаның бірнеше сатысынан өтетіні ешкімге құпия емес. Сондықтан тауарды жеткізушілер тізбегінен алыпсатарларды шеттету керек. Ауыл шаруашылығы өнімдерін саудалауда логистикасын бір жолға қою өте маңызды. Осыған дейін де бұл мәселе жайлы айтылып, тапсырмалар берілген», — деді Мемлекет басшысы.
Оның айтуынша, делдалдардың жұмыс істеу бағытын тергеу жөніндегі өңірлік комиссиялар алыпсатарлықты, сөз байласуды және заңсыз сауда үстемелерін анықтау жөніндегі жұмысты күшейтуі тиіс. Бағалар тапсырыс бойынша реттелмейді, бірақ әкімдер сатып алушылармен тиісті түрде айналыса алады.
«Үкімет ауыл, аудан, қала, облыс әкімдерімен бірлесіп 2022-2024 жылдарға арналған инфляция деңгейін бақылау және төмендету жөніндегі шаралар кешенін тиімді және уақтылы іске асыруды қамтамасыз етуге тиіс. Бұл негізгі мәселе менің жеке бақылауымда болады», — деді Қасым-Жомарт Тоқаев.
