Қойылым облыстық Махамбет Өтемісұлы атындағы академия театрында өтті. Спектакль атақты театр және кино әртісі, КСРО халық әртісі, Қазақстанның Еңбек Ері Асанәлі Әшімовтың 85 жылдығына арналды. «Тағдыр тақтасы» — бұл әртістің өмір және шығармашылық жолы туралы қойылым.
«Қазақ мәдениеті тарихында аты аңызға айналған адамдар бар. Оның барлығымен кездесу бұйырмады. Қазір бізде сондай мүмкіндік бар. Асанәлі Әшімов — аңыз адам, ол өзінің бар ғұмырын театр мен киноны дамытуға арнады. Атыраулық тұрғындарды бүгінгі атаулы күнімен құттықтаймын! Асанәлі Әшімовтың өмірі жастарға үлгі болуға лайық», — деді құттықтау сөз алған өңір басшысы Серік Шәпкенов.
Өз кезегінде әртіс атыраулықтарға қонақжайлығы үшін алғыс айтты.
«Өнер халыққа тиесілі, сол себепті менің мұнда келуім — жиналған қауымның алдындағы шығармашылық есеп. Біз үшін халықтың ыстық ықыласы мен сый-құрметінен асқан бақыт жоқ. Және бұл менің 85 жылымның зая кетпегенінің белгісі», — деді «Жаңа ғасыр» театр әртістеріне алғыс айтқан Асанәлі Әшімов.
