Синоптиктер температура аптаның ортасына дейін көтеріледі деп санайды.
Болжамға сәйкес, сәрсенбіге қарай Италиядағы Сардиния аралының оңтүстігінде ауаның температурасы 46°C болады, ал құрлықтық Италияның оңтүстігінде ең жоғары температура — 43°C.
Соңғы болжамға сәйкес, Испанияның оңтүстігінде максималды температура 46°C, ал Францияның оңтүстігінде — 40°C жетеді.
АҚШ-тың оңтүстік-батысында да аптап ыстық болады. Метеорологтар 38 қалада температура рекорды жаңаруы мүмкін деп ескертті.
Ұлттық метеорология қызметінің мәліметінше, жексенбіде Лас-Вегаста (Невада штаты) температура 46,6°C-қа жетті.
Аризона штатының Феникс қаласында ауа температурасының рекордтық 47,2°C дейін көтерілетіні болжанып отыр.
Жексенбіде ең жоғары температура Калифорниядағы Өлім алқабында тіркелген. Ғаламшардағы ең жылы жерлердің бірінде 53,9°C ыстық болды.
Мамандар жылу толқынының басты проблемасы күндізгі ауа температурасының жоғарылауында емес, түнде жеткілікті түрде төмендемейтінінде деп санайды.
Жақын арада, Аризонадағы түнгі температура 32°C-тан төмендемейді деп болжанып отыр.
Британдық метеорологиялық орталықтың мәліметінше, жексенбіде Қытайда ел тарихындағы ең жоғары температура тіркелді — Шыңжаң провинциясында термометр бағанасы 52,2°C дейін көтерілді.
Оңтүстік Кореяда ауа райының күрт өзгеруінен нөсер жауын жауып, көшкін мен су тасқынына ұласты, ал Жапонияда кем дегенде 60 адамға ыстық өтті.
Жапон аралдарындағы рекордтық температура (41,1°C) 2018 жылы Кумагая қаласында тіркелген. Биылғы жазда алдыңғы рекорд жаңаруы әбден мүмкін.
БҰҰ-ның мамандандырылған бөлімшесі — Дүниежүзілік метеорологиялық ұйым Жерорта теңізі аймағында қалыптасқан жылу ағымдағы аптаның ортасына қарай күшейіп, тамыз айында жалғасатынын ескертті.
Келесі аптада Мароккода температура 49°C дейін көтерілуі мүмкін.
