«Ол өзінің Тараздан екенін айтты. Қазір жүктерді ауыр жүк көлігіне тиеп жатқанын, тоңазытқышты бірнеше сағатта тегін жеткізіп беретінін айтты. Әскери адам болғандықтан, басқа жаққа іс-сапарға кететіні жайлы айтып, жағдайын түсіндіргендей болды», – дейді зардап шегуші жұп.
Ер адам басқа да жиһаз, ойын приставкасы мен тұрмыстық техника сатып алуды ұсынған. Барлығы жаңа болып көрінгендіктен, ерлі-зайыптылар тауар үшін ақшаны бірден аударып жіберген. Кейін ер адам көлікке тиелген тауарлардың суретін жіберіп, байланысқа шығуды доғарған.
«Бірден полицияға жүгіндік. Барлық банк аударымдары тіркелді. Хабарламаларды түгел көрсеттік. Бір қызығы, тек WhatsApp мессенджері арқылы сөйлестік, телефоны үнемі сөндіріліп тұратын», – деді зардап шегуші.
Құқық қорғаушылардың айтуынша, алаяқтар жалған нөмірлерді пайдаланады. Сондықтан, мұндай қылмысты ашу қиынға соғады.
«Қазір И. есімді азаматтың арызы бойынша Жетісу аудандық полиция басқармасында Қылмыстық кодекстің 190-бабы, 2-бөлігі «Алаяқтық» бойынша тергеу жүріп жатыр. Жыл басынан бері Алматы қаласында интернет-алаяқтықтың 1 400 дерегі тіркелді», – деді Алматы қаласы ПД ресми өкілі Салтанат Әзірбек.
Полиция департаментінде интернеттегі қылмыстармен күресу үшін арнайы мамандар тобы жұмыс істейді. Олардың техникалық мүмкіндіктері алаяқтарды анықтауға жетеді, тек бұл ұзақ уақытты талап етеді.
