Ауыл халқы далада жүру былай тұрсын, үйдің терезесін ашудан қалыпты. Жөтел қысу, көздің ашуы, бастың ауруы жиілеп кеткен.
«Күн ысыған сайын жағымсыз иіс күшейіп бара жатыр. Түнде ұйықтай алмайтын жағдайға жеттік. Түнімен желдеткішін гүрілдетіп қосып қояды. Халық қиналып кетті. Менде жөтел пайда болды. Қаншама дәрі ішіп жатырмын, пайдасы жоқ. Мұрын ашиды, бас ауруы пайда болды», – дейді ауыл тұрғыны Айдос Иманбеков.
Ал кәсіпорынның инженер-экологының айтуынша, 45 жыл бұрын пайдалануға берілген құс фабрикасы барлық санитарлық, экологиялық талапқа сай.
Ауыл әкімінің өз уәжі бар. Ол облыстық экология департаментіне және аудандық саниатарлық-эпидемиологиялық бөлімге өз тарапынан хат жолдаған.
«Құзіретті орган санитарлық қорғау аймағының сақталуын және ауаның айналаға таралған иісінде зиянды заттар бар-жоғын тексеріп, қорытындысын береді», – деді Жаңашар ауылдық округының әкімі Бақытжан Чурмақов.
Алайда, облыстық экология мен санитария департаментінің құс фабрикасын қашан тексеретіні және нәтижесінде қандай шешім шығаратыны әзірге белгісіз.
