Кездесуде өңір басшысына жол қозғалысы ережелерін бұзу фактілерін анықтау үшін фото-бейнетіркеу жүйесін енгізу және пайдалануға қатысты жоба ұсынды, деп хабарлайды Alataunews.kz ақпарат агенттігі.
«Бірегей жаңа шешім – автономды камералар. Олар сыртқы қуат көздеріне тәуелді емес, бейнебақылау камераларын қамтамасыз ететін электр энергиясы жаңартылатын энергия көздерінен өндіріледі. Сондай-ақ, бұл камераларға интернет қажет емес», – деп атап өтті «Tree Energy» ЖШС-нің директоры Жамбыл Мұзбаев.
Сонымен қатар, катарлықтар «жасыл» автономды мектептер салып жатыр. Бұл компаниямен жаңартылатын энергиямен қамтамасыз ету бойынша бірге жұмыс істеу жоспарланған. Оларды Алматы облысында осындай екі мектеп салуға да көндірген. Бірақ ол үшін жер керек. Болгария, Түркия сияқты елдермен де атқаратын жобалар бар, сондықтан оларды өңірге тарту бойынша мәселелерді қозғады.
«Жолдардағы апатты жағдайлардың алдын алу және мектеп құрылысы бойынша жобаларыңыз қызықты. Өйткені жол көлік оқиғасы және үш ауысымды мектеп проблемалары өңірде бірінші орындардың бірінде тұр», – деді өңір басшысы.
Марат Сұлтанғазиевтің айтуынша, егер атаған инвесторлар өңірге келсе, олармен кездесіп, бірлескен жобаларды талқылауға дайын.
Айта кету керек, компания жел генераторларын, микрогидроэлектрстанцияларын және күн электр станцияларын өндіруді және жеткізуді табысты жүзеге асырады.
