Өңірде 500-ден астам сайлау учаскесі жұмыс істеп жатыр. Таңғы уақыттан бастап тұрғындар белсенді түрде дауыс беруге келіп, өз таңдауын жасауда.
Дауыс беруге ауыл тұрғындары ғана емес, облыстың ірі қалаларындағы азаматтар да ерте келіп жатыр. Сайлау учаскелеріндегі комиссия мүшелері мен бақылаушылар халықтың белсенділігі жоғары екенін атап өтті.
Кейбір учаскелерде дауыс беру рәсімі дәстүрге сай батамен басталды. Ақсақалдар ел үшін маңызды саяси науқанның басталуына ақ батасын беріп, тұрғындарға бірлік пен береке тіледі.
«Бүгін біз үшін маңызды күн. Біз жаңа Конституцияға дауыс беріп жатырмыз. Ол елдің дамуына серпін беріп, келер ұрпаққа жаңа мүмкіндіктер ашады деп сенеміз. Еліміз дамып келеді, сондықтан өзгерістерге ілесіп, заман талабына сай алға жылжуымыз керек», – дейді дауыс беруге келген тұрғындардың бірі.
Сондай-ақ тұрғындар сайлау учаскелеріндегі дайындық деңгейіне оң баға беруде. Олардың айтуынша, дауыс беру орындары барлық қажетті құрал-жабдықтармен қамтамасыз етілген, ғимараттар жарық, жылы әрі таза.
Көптеген азаматтар үшін мұндай қоғамдық-саяси шаралар – бір-бірімен жүздесіп, пікір алмасуға және ел болашағына қатысты маңызды шешім қабылдауға мүмкіндік.
Айта кетейік, референдум учаскелері кешкі сағат 20:00-ге дейін жұмыс істейді. Жалпы республика бойынша 10 402 учаске ашылған.
