«Қапшағай уылдырық шашу-селекциялық шаруашылығы – 1973» ЖШС басшысының айтуынша, кәсіпорын Еңбекшіқазақ ауданы Шалқар ауылында орналасқан. Бүгінгі таңда фермада амур, күміс тұқы (толстолобик), тұқы (карп) сияқты балықтар өсіріледі.
«Бірінші кезекте, Кәсіпкерлер палатасы су жетіспеушілігі мәселесіне көңіл аударса деймін. Екінші мәселе — айналма арналардың бітелуі болып тұр. Салдарынан су жылдамдығы бәсеңдеді. Тазартуды қажет ететін каналдың ұзындығы – 10 километр», — дейді кәсіпорын басшысы Азалхан Әлиев.
Азалхан Әлиевтің мәліметіне қарағанда, қазіргі уақытта инкубациялық цехтың қуаттылығы 50 000 уылдырық және 10 000 шабақ өсіруге жеткілікті. Тазалау жұмыстары жүргізілгеннен кейін инкубациялық цехтың қуаты 3 есе артады.
«Санитарлық мәселені шешу үшін «Драглайн» арнайы техникасы қажет. Қазіргі уақытта техниканы сатып алу үшін облыстық бюджеттен қаражат бөлінді. Енді мемлекеттік сатып алу жүйесі арқылы тиісті іс-шаралар жүргізіледі», — дейді ауыл шаруашылығы басқармасының маманы Медет Керімқожанов.
Оның мәліметіне сүйенсек, аталған түйіткілдердің түйіні жақын арада тарқатылады. Айта кетейік, кәсіпкердің мәселесін талқыға салған басқосуға «Атамекен» Ұлттық Кәсіпкерлер палатасының облыстағы өкілі Қуандық Чункунов пен облыс әкімінің орынбасары Арслан Дандыбаев қатысты.
