Америкалық кәсіпкер Илон Маск жаңа жобасын — Grokipedia деп аталатын онлайн энциклопедияны таныстырды. Бұл платформа — әлемге әйгілі «Уикипедияның» баламасы ретінде ұсынылып отыр.
Масктың айтуынша, Grokipedia.com сайтында қазіргі таңда шамамен 900 мыңға жуық мақала бар. Дәл қазір ресурс 0.1 нұсқасында жұмыс істеп тұр. Алайда алғашқы пайдаланушылар кейбір техникалық ақауларға шағымданған.
Сайттың басты бетінде кітапхана құрамында 885 279 мақала бар екені көрсетілген. Салыстыру үшін, «Уикипедияда» бұл көрсеткіш 8 миллионнан астам.
Илон Маск әлеуметтік желі X-те жариялаған жазбасында Grokipedia-ның 1.0 нұсқасы қазіргі нұсқадан он есе жақсы болады, ал қазіргі күйінде-ақ «Уикипедиядан артық» деп бағалаған.
Бұған жауап ретінде «Уикипедияның» негізін қалаушылардың бірі Джимми Уэйлс Washington Post басылымына берген сұхбатында, жаңа жобадан үлкен үміт күтпейтінін айтты. Оның пікірінше, мәтінді өңдеуге арналған жасанды интеллект үлгілері әлі жетілмеген, сондықтан «қателер көп болуы мүмкін».
Айта кетейік, Масктың xAI компаниясы әзірлеген Grok чат-боты бұған дейін де бірнеше дәлсіздігі мен қателіктері үшін сынға ұшыраған болатын. Дегенмен, кәсіпкер мен X компаниясы аталған кемшіліктерді түзетуге уәде берген.
Өткен айда Илон Маск әлеуметтік желідегі жазбасында xAI командасы Grokipedia платформасын құру үстінде екенін хабарлаған еді.
