Іле ауданындағы «Дәулет-Бекет» түйе шаруашылығының жетекшісі құрғақ шұбатқа деген сұраныс жыл сайын артып келе жатқанын айтады. Осы уақытқа дейін шаруашылық қазақстандық өніммен Кеден одағы елдерін қамтамасыз етіп келген. Алайда, Украинадағы соғысқа байланысты жоспарды орындау мүмкін болмай отыр. Десе де, құрғақ шұбатқа деген әлемдік сұраныс жоғары. Қазір тапсырыс берушілердің қатарына Қытай мен Дубай қосылған. Жергілікті кәсіпкер өтініштерді қанағаттандыра алмай жатыр.
«2019 жылы Президентіміз Қасым-Жомарт Тоқаев Қытайға барғанда шұбатты экспорттауға жол ашып берді. Осылайша, 1 млрд теңге инвестиция тартып, өткен жылы түйе сүтін құрғататын зауыт аштық. Қазір өнімнің 70-80% Қытайға, Дубайға экспортталады. Құрғақ сүтке сұраныс 100 тонна болып тұр. Сол себепті түйе басын 15000-ға жеткізуді жоспарлап отырмыз», — дейді кәсіпкер Сыдық Дәулетов.
Кәсіпкердің шаруашылығында осы күні небары 5000 түйе бар. Кәсіпорынның өндірістік қуаты айына 30 тонна дайын ұнтақты құрайды, жобаның құны – 1 млрд теңге. Шұбаттың тәуліктік сауымы 5-7 тоннаны құрайды.
Сусынға деген мұндай сұраныс оның дәрумендерге бай құрамына (кальций, мыс, темір, магний, мырыш, фосфор және басқа да В1, В2, С және D) байланысты. Ми мен жүйке жүйесін қоректендіретін лактоза да көп.
Шұбат асқазан жарасы, демікпе және туберкулез кезінде пайдалы. Ұйқы безінің, ішектің, бауырдың жұмысын қалыпқа келтіреді, жүйке жүйесін нығайтады, ағзаның жұқпалы ауруларға төзімділігін арттырады. Шұбат витамин тапшылығы, қант диабеті, анемия, сарқылу, псориаз, созылмалы гастрит және колит үшін профилактикалық және емдік құрал ретінде ұсынылады. Шұбат табиғи иммуномодулятордың қасиеттеріне ие.
