Жамбыл ауданының ауыл шаруашылығы саласында облыстағы үлесі — 9,7%.
Аудан әкімінің айтуынша, соңғы 6 айда 10,4 мың тонна ет, 50,7 млн. дана жұмыртқа, 30,4 мың тонна сүт өндірілген.
Жиын барысында Нұрлан Ертасұлы ортақ жайылымдық жерлердің аздығы күн тәртібіндегі маңызды мәселе екенін атап өтті.
«Аудандағы 1 млн. 931 мың гектар жердің 1 млн. 496 мың гектары ауыл шаруашылығына арналған жер болып табылады, оның 90 пайыздан астамы жайылымдық жер. Мал басына шаққандағы норматив бойынша 212 мың гектар ортақ жайылым жер қажет», — деді Жамбыл ауданының әкімі Нұрлан Ертас.
Аудан бойынша жалпы көлемі 39 мың 69 гектар жер учаскелері мемлекет теңгеріміне қайтарылып, 54 елді мекенге ортақ жайылым жер ретінде тұрақты пайдалануға берілген.
Одан бөлек шаруа қожалықтарында пайдаланылмай жатқан 49 мың гектар жайылымдық жер қайта айналымға енгізілді.
«Ауданның жұмыс тобымен анықталған ауылшаруашылық бағытындағы пайдаланылымай жатқан жайылым жер көлемі 55,6 мың гектар. Анықталған 55,6 мың гектар жер 17 ауылдық окрутегі 79 шаруа қожалығына тиесілі, аталған жерді мемлекетке қайтару үшін нақты шаралар қабылданып, жұмыстар жүргізілуде», — деп түйіндеді аудан басшысы.
