«Ауданда 7,1 мың гектар егістік алқабын жүгері алып жатыр. Биыл оның жалпы түсімі 83 мың тоннаны құрады. Басқаша айтқанда, аудан барлық облыс көлемінде өсірілетін жүгерінің төрттен бір бөлігін береді және облыс бойынша Еңбекшіқазақ ауданынан кейін 2-орынды алады», — деді Марат Сұлтанғазиев.
Оның айтуынша, ауданда жүгері өңдейтін кәсіпорын жоқ.
«Біз агроөнеркәсіп кешені өнімдерін қайта өңдеуді дамыту туралы айтып отырмыз және бұл сала әлі күнге дейін дұрыс жолға қойылмаған», — деді өңір басшысы.
Сонымен қатар ол аталған мәселені шешу керектігін айтты.
Айта кетейік, 2022 жылы егістік алқабының аумағы 700 гектарға ұлғайтылды. Жалпы көлемі — 23 мың гектардан асады. Ұйғыр ауданы ауыл шаруашылығы дақылдарының жалпы егіс көлемі бойынша облыстағы 10 ауданының ішінде 9-шы орынды алады.
