Қазақстан халқы Ассамблеясының XXXIV сессиясында Мемлекет басшысы Қасым-Жомарт Тоқаев Ассамблеяның осы уақытқа дейінгі қызметіне жоғары баға беріп, алдағы кезеңде жүзеге асырылуы тиіс маңызды міндеттерді атап өтті.
Президенттің айтуынша, бірінші кезекте Ассамблея өңірлік деңгейдегі жұмысын жандандыруы қажет. Ол былтыр Түркістан қаласында ашылған жаңа Достық үйінің маңызын ерекше атап өтті.
«Енді осындай Достық үйін халық тығыз қоныстанған Алматы облысында салу керек. Бұл ғимарат өңірдің қоғамдық өмірінің маңызды орталығына айналады. Қордай, Ұйғыр, Сайрам, Панфилов және өзге де этносаралық қатынастар ерекше назарды талап ететін аудандарда Ассамблея бөлімшелерін ашу қажет. Сонымен қатар, бірқатар қала мен аудан орталықтарында да жаңа Достық үйлері ашылады деп жоспарланып отыр. Мен бұл бастаманы толығымен қолдаймын. Біз қоғамдық келісім инфрақұрылымын біртіндеп кеңейтіп, барлық өңірдегі Достық үйлерін туристік бағыттар картасына енгізуіміз керек», – деді Мемлекет басшысы.
Ол сондай-ақ, құзырлы органдар мен әкімдер Ассамблеяның этномедиация саласындағы жұмысына жан-жақты қолдау көрсетуі тиіс екенін ерекше атап өтті.
Екінші маңызды міндет – бірлік пен келісім идеяларын ақпараттық кеңістікте кеңінен насихаттау.
«Бұл – Ассамблеяның барлық құрылымына, әсіресе, журналистер клубына жүктелетін кезек күттірмейтін міндет. Салаға жауапты министрлік пен өңір басшылары ҚХА журналистер клубының құрамына жетекші БАҚ өкілдерін енгізіп, оның жұмысын бірыңғай алгоритммен жүйелеуі қажет. Сонымен қатар, этностардың ана тілдерінде жарық көретін, әсіресе өңірлік бұқаралық ақпарат құралдарына тұрақты түрде қолдау көрсету маңызды», – деді Қасым-Жомарт Тоқаев.
