Жәбірленуші тараптың қорғаушысы Асылбек Әбдіраимовтың айтуынша, тергеушілердің әрекетсіздігі ауыр қылмысқа, соның ішінде екі жастағы қыздың ұрлануына және адам өліміне себеп болған.
«Екі тергеуші қызметтік өкілетін асыра пайдаланып, әрекетсіздік көрсеткені үшін айыпталды. Тергеу аяқталып, іс сотқа жіберілді. Олар ҚР Қылмыстық кодексінің 362-бабы, 4-бөлік, 3-тармақ (“қызметтік өкілетін асыра пайдалану, ауыр зардапқа әкеп соққан”) және 370-бап, 4-бөлік, 1-тармақ (“қызметтегі әрекетсіздік, ауыр зардапқа әкелген”) бойынша қаралады», — деді Әбдіраимов.
Сонымен қатар, осы іс бойынша учаскелік полиция қызметкерлерінің әрекеттері де сотта қаралуда. Олардың арызды қабылдамай, қызметтік міндеттерін дұрыс орындамағаны белгілі болды.
Еске салсақ, қайғылы оқиға 2025 жылғы 6 қыркүйекте Қызылқайрат ауылында болды. Жергілікті көлік жөндеу станциясы қызметкері ауыл тұрғынын зорлап, бір ай бойы оны бопсалап, жалаңаш фотоларын жәбірленушінің әріптестеріне таратқан. Кейін ол әйелдің ағасын көшенің ортасында өлтіріп, оның екі жасар қызын ұрлап кеткен.
