Жиын барысында табиғатты қорғау ісіне айрықша үлес қосқан сала қызметкерлеріне Экология және табиғи ресурстар министрлігі мен облыс әкімінің атынан Құрмет грамоталары мен Алғыс хаттар, сондай-ақ «Қазақстан орманын қорғаудағы мінсіз қызметі үшін» төсбелгілері табыс етілді.
Мерекелік шара аясында Кеген орман шаруашылығының жаңа ғимаратының ашылу рәсімі өтті. Заманауи талаптарға сай салынған нысан орманшылардың тиімді әрі жайлы жағдайда жұмыс істеуіне мүмкіндік береді.
Іс-шараға қатысқан Алматы облысы әкімінің орынбасары Бақытнұр Бақытұлы орман шаруашылығы қызметкерлерін кәсіби мерекемен құттықтап, олардың ел экологиясын сақтау жолындағы еңбегіне жоғары баға берді.
«Орман шаруашылығы – табиғат пен экологияның тірегі. Мемлекет басшысы Қасым-Жомарт Тоқаевтың 2 миллиард ағаш отырғызу жөніндегі тапсырмасын орындауда Алматы облысы алдыңғы қатарда. Бұл бағыттағы жұмыс сіздердің еңбектеріңіздің арқасында жүзеге асып жатыр», – деді ол.
Биыл орман мекемелерін материалдық-техникалық тұрғыдан нығайтуға 217,9 миллион теңге бөлініп, патрульдік автокөліктер, тракторлар мен экскаваторлар сатып алынды. Сонымен қатар, 829 миллион теңгеге өртке қарсы 26 техника алу және өрт қаупі жоғары аймақтарға 18 бейнебақылау камерасын орнату жұмыстары жүргізілуде. Бұл жүйелер орман өрттерін ерте анықтап, жедел әрекет етуге мүмкіндік береді.
Салтанатты жиын жылы лебіздер мен мерекелік құттықтауларға ұласып, табиғатты қорғауға өмірін арнаған орманшылар қауымының еңбегіне құрмет көрсетілді.
Мереке соңында қатысушылар орман саласы мамандарына алғысын білдіріп, олардың табиғатты аялау жолындағы игі істеріне табыс тіледі.
