«Облыс бюджетінің жоспары 877,7 млрд теңгені құраса, атқарылуы 728,3 млрд теңгені немесе 83% құрады. 149,4 млрд теңге орындалмады. Игерілмеген бюджет қаражатының 6,1 млрд теңгесінің 4,4 млрд теңгесі тиімсіз жоспарлау және конкурстық рәсімдерді уақтылы өткізбеу себебінен игерілмеген. Мысалы, құрылыс басқармасы бойынша 1,5 млрд теңге, энергетика және тұрғын үй-коммуналдық шаруашылық басқармасы 1,1 млрд теңге, білім басқармасы 274,3 млн теңге, Талғар ауданы 242,0 млн теңге, Райымбек ауданы 253,5 млн теңге, Қонаев қаласы 228,2 млн теңге», — дейді өңір басшысы.
Республикалық бюджеттен берілетін нысаналы трансферттер бойынша 2,9 млрд теңге игерілмеген, оның ішінде құрылыс басқармасы бойынша 1,1 млрд теңге. Салдарынан көзделген нәтижеге қол жеткізілмей отырған ведомстволар қатарында энергетика және тұрғын үй-коммуналдық шаруашылық, кәсіпкерлік басқармасы да бар.
«Осы ретте, экономика және бюджеттік жоспарлау басқармасы бюджетті жоспарлау кезінде 2022 жылғы қателерді ескерсін және бюджетті нақтылау (түзету) кезінде қаражат бөлуге мониторинг жүргізсін», — деп тапсырды әкім.
Марат Сұлтанғазиевтің айтуынша, шенеуніктердің тиімсіз жоспарлауы салдарынан «Жайлы мектеп» ұлттық жобасының өңірде тиісті деңгейде іске асырылмай отыр. Салынатын 63 мектептің Талғар ауданындағы 8 мектептің учаскесі бойынша құқық белгілейтін құжаттар ұсынылмаған.
Ал, 2020 жылдың қаңтар айында Дәулет ауылында мектеп едендері шөгіп қалуына қарамастан, Талғар ауданының әкімдігі төтенше жағдай бойынша хабарландыру және қалпына келтіру жұмыстарын бастау үшін облыстық бюджеттен қаражат бөлуге өтінім бермеген.
Сонымен қатар, Талғар қаласындағы 72 пәтерлі тұрғын үйдің құрылысы, инженерлік-коммуникациялық желілерінің құрылысы дайын болмауына байланысты осы уақытқа дейін пайдалануға берілмеген.
Іле, Кеген, Райымбек аудандарында ауданішілік автобус бағыттары ұйымдастырылмаған, тарифтік комиссия және жолаушылар мен багажды тасымалдау конкурстық комиссиялары құрылмаған. Жамбыл, Қарасай, Іле, Еңбекшіқазақ, Балқаш, Кеген, Райымбек, Ұйғыр аудандарында жолаушыларды тасымалдау тарифі бекітілмеген (аудандарда бөлінген субсидияны игеру және электронды билет жүйесін енгізуге кедергі тудырып отыр).
