Алматы облысының санитарлық-эпидемиологиялық қызметі 2024 жылдың 9 айындағы жұмыс нәтижелері туралы баяндады, деп хабарлайды alataunews.kz.
Бас мемлекеттік санитариялық дәрігер Марат Исмаиловтың айтуынша, басты міндет – өңірдің санитарлық қауіпсіздігін қамтамасыз ету.
Жыл басынан бері 4,5 мыңнан астам жұқпалы ауру ошағында эпидемияға қарсы шаралар ұйымдастырылып, 3 мыңнан астам адам тексерілді, 995 ошақ толықтай дезинфекцияланды. Сонымен қатар, кене энцефалиті, безгек және туляремия сияқты ауруларға қарсы кешенді шаралар қабылданды.
Исмаиловтың мәліметінше, 738 гектар жер кенеге, 70 гектар су айдыны безгекке қарсы өңделіп, 2 мың гектар аумақта туляремияға қарсы дератизациялық жұмыстар атқарылды.
Жұқпалы аурулардың алдын алу мақсатында тұрақты мониторинг жүргізіліп, 52 ауру түрі тіркелмеді, ал 28 түрлі сырқаттанушылық азайды. Мысалы, туберкулез 72%-ға, В гепатитінің созылмалы түрі 33,3%-ға, бруцеллез 33,9%-ға қысқарды. Алайда, вакцинация мәселесі өзекті күйінде қалуда, әсіресе балалар арасында қызылша, көкжөтел және А вирустық гепатиті жиі кездеседі.
Мемлекеттік бақылау мен қадағалау аясында 1 мыңнан астам қызмет көрсетілді, барлығы «Е-лицензиялау» порталы арқылы автоматтандырылды. Бақылау нәтижесінде 620 адамға 300 миллион теңгеден астам айыппұл салынды. Жеке және заңды тұлғалардан 1 034 өтініш қаралды, олардың 90%-ы ауа мен судың ластануы, жоғары шу деңгейі, бөгде иістер және санитарлық аймақтардың сақталмауы мәселелеріне қатысты.
Марат Исмаиловтың айтуынша, санитарлық қызмет халықтың денсаулығын қорғау және жұқпалы аурулардың алдын алу бағытындағы жұмыстарын жалғастыра береді.
