Шараны Алматы облысының Туризм басқармасы, Мотоцикл жүргізушілері қауымдастығы және Қонаев қаласының әкімдігі бірлесіп ұйымдастырды.
Іс-шара мотоцикл әуесқойлары үшін жыл сайын асыға күтілетін оқиғаға айналған. Ride & Rest – бұл жай ғана мотошеру емес, еркіндік, достық, жылдамдық пен адреналиннің нағыз мерекесі. Биылғы шарада Алматы облысы әлемнің түкпір-түкпірінен келген 2000-нан астам мотоцикл жүргізушісін қабылдады.
Қатысушылардың арасында Ресей, Қырғызстан, Өзбекстан, Беларусь, Иран және басқа да елдердің өкілдері болды. Олар жүздеген, тіпті мыңдаған шақырымды артта қалдырып, Қонаевта өткен бұл ерекше оқиғаның бір бөлігі болуға асықты.
Мотошеру таңғы уақытта Алматы мен Алматы облысының шекарасында басталды. Осында жиналған байкерлер үлкен колонна құрап, Қонаевқа қарай аттанды. Мотор үні мен фара жарығы қала көшелеріне ерекше сән беріп, көрермендердің де қызығушылығын оятты. Шерудің соңғы нүктесі – ASP Club аумағы болды, мұнда қатысушыларды алуан түрлі қызықты іс-шаралар күтіп тұрды.
Ride & Rest 2025 фестивалі тек мотошерумен шектелмей, нағыз шоуға айналды.
Қонаевтағы ASP Club алаңында өткен мерекелік бағдарламалар мыналарды қамтыды:
? Андрей Головняның стантрайдинг шоуы – мотоциклмен түрлі трюктер көрсететін, бірнеше дүркін чемпионның әсерлі өнері;
? ASP Racing командасының дрифт-шоуы – күйген резеңке иісі мен асфальт үстіндегі дәлдікке негізделген қойылым;
? Мотоджимхана жарысы – байкерлердің шеберлігі мен ептілігін сынайтын арнайы бағдарлама;
? «Тұлпар» автосалонының ретрокөлік көрмесі – көрермендерді автоклассика әлеміне жетелеген сирек кездесетін машиналар топтамасы;
? Орталық Азия мотоклубтарының белсенділіктері – көрмелер, шеберлік сыныптары, мотомәдениет туралы еркін пікір алмасу алаңдары.
Кешке қарай фестивальдің сахнасында нағыз рок кеші өтті.
Көрермендер алдында:
NAIV және ЛЕПРИКОНЫ топтары – басты хедлайнерлер ретінде өнер көрсетті;
Сонымен қатар, WOOD HELICOPTER және НЕ ВЗРОСЛЕЙ Band музыкалық ұжымдары атмосфераны жандандырды.
Ride & Rest 2025 мотошеруі тек мотоцикл әуесқойларын ғана емес, жалпы туризм мен мәдениет саласындағы ілгерілеуге де серпін берді. Іс-шара Алматы облысының туристік әлеуетін арттыруға, халықаралық байланыстарды нығайтуға және мотомәдениетті дәріптеуге бағытталған маңызды қадам болды.
Алдағы жылдары да бұл фестиваль өз ауқымын кеңейтіп, Орталық Азиядағы ең ірі мото-мерекелердің бірі болып қала бермек.
