Мәселен, Райымбек ауданындағы салтанатты шарада мемлекеттік рәміздерімізге құрмет көрсетіліп, «Алтын адам», «Томирис патшайым», «Абылай хан» секілді ерекше үш бірдей қойылым сахналанды. Сонымен қатар орталық алаңда ауданның ауылшаруашылығы өнімдері жәрмеңкесі өтті.
«Көгілдір аспан түстес Туы, елдікті паш етер Елтаңбасы, ет-жүректі елжіретер Гимні, ұлан байтақ жерді алып жатқан ата қонысы бар, шекарасы шегенделген Қазақстан дейтін мемлекетті қазір бүкіл әлем танып білді», — деді шарада сөз алған аудан әкімі Берік Дүйсенбаев.
Сонымен қатар ол 2022 жыл еліміз үшін тың жаңалықтар мен ұлы өзгерістерге толы болғанын, Мемлекет басшысының Жарлығымен Абай, Жетісу, Ұлытау облыстары құрылғанын тілге тиек етті.
«Ардақты ағайын! Қадірлі жерлестер! Араға жылдар салып, қайта оралған төл мерекеміз – Республика күні құтты болсын! Дамудың даңғыл жолына бағыт түзеген Тәуелсіз Қазақстанымыздың болашағы жарқын болсын! Осынау еркін елдің әрбір перзентінің кеудесі қуанышқа толып, әр шаңыраққа бақ пен бақыт орнасын!», — деді аудан басшысы.
Аталған ауданда ұлттық мереке ұлықталып, жалпақ жұрт үйлеріне көтеріңкі көңіл-күймен тарады.
