Шара барысында әскери-патриоттық бағытты ұстанатын 5-сынып оқушылары ант қабылдады.
«Бүгінде елімізде 6 мыңға жуық әскери-патриоттық клубтар және сыныптар ашылған. «Жас сарбаз» қозғалысы қазір 170 мыңдай өренді біріктіріп отыр. Ауылымызда мұндай сыныптың ашылғанына қуаныштымыз», — деді мектеп директоры Руслан Кожамсеитов.
Оның айтуынша, 54179 әскери бөліммен бірлесіп жасалған екіжақты меморандумға сәйкес жұмыс жоспары құрылады. Аталған жоспар аясында «Жас сарбаз» әскери сыныбында аптасына екі рет жауынгерлік сабақтар өткізіледі. Әскери бөлім тарапынан оқушыларды тарихи орындарға, әскери музейге және түрлі жарыстарға апару секілді іс-шаралар ұйымдастырылатын болады.
5 ұл тәрбиелеп отырған ауыл тұрғыны Әбдиев Болат үшін бүгін ерекше есте қалар күн. Себебі, енді оның 2 баласы ерекше сыныпта оқитын болады.
«Балалардың тәртібіне көңіл бөлген дұрыс. Өйткені, олар — еліміздің болашағы, кемел келешектің тұтқасы. Меніңше, кез келген бала рухы мықты, ұлтын сүйетін азамат болып өскені абзал. Бұл сыныптан үлкен үміт күтеміз», — деді ол.
Салтанатты шараға 54179 әскери бөлімі командирінің орынбасары, майор Жақсыбаев Талғат, қалалық қорғаныс істері жөніндегі басқарманың бастығы, подполковник Жексембаев Қанат, қалалық мәслихат депутаты, қоғамдық кеңестің мүшесі Горяной Сергей және ауыл ақсақалдары, қоғам белсенділері қатысты.
Салтанатты басқосуда қадірлі қонақтар сөз алып, ізгі тілектерін жеткізді. Жиын соңы концерттік бағдарламаға ұласты.
