Аумағы 2,1 гектарды құрайтын бұл спорт аймағы 2017 жылы салынғанымен, осы уақытқа дейін күрделі жөндеу жүргізілмеген еді. Биыл тұрғындардың сұранысына сай толықтай жаңартылып, заманауи талаптарға сай абаттандырылды.
Жаңғыртылған аумақта жағажай волейболы мен футболына арналған алаңдармен қатар, үстел ойындарына лайықталған тоғызқұмалақ пен шахмат үстелдері, балалар мен жасөспірімдерге арналған ойын және воркаут алаңдары орнатылған.
Аумақтың ерекше көңіл қуантары – ұлттық нақышта безендірілгені. Жаяу жүргіншілер жолы қазақы оюлармен әрленіп, кіреберіс тұсына халқымыздың көне ұлттық ойыны – алтыбақан қойылған. Алаң ортасына кеседен төгілген ақ сүтті бейнелейтін гүл композициясы орналастырылып, айналасына раушан гүлдері егілген. Бүкіл аумақ көгалдандырылып, көріктендірілген. Жөндеу жұмыстарын ШЖҚ «Қонаев Көркейту» мемлекеттік коммуналдық кәсіпорны атқарды.
«Тұрғындар арасында салауатты өмір салтын насихаттау, жастардың бос уақытын тиімді өткізуіне жағдай жасау – басты мақсатымыз. Жағажай спорт алаңының дәл жанында кроссфитке арналған бөлек аймақ бар. Қазірдің өзінде бұл жер таңғы және кешкі уақыттарда қала тұрғындарының сүйікті орнына айналып үлгерді. Алдағы уақытта да осындай қоғамдық кеңістіктерді абаттандыру жалғасады», — деді Қонаев қалалық ТҮКШ бөлімінің басшысы Тимур Ақмырзаев.
Тұрғын Айдос Ескелдинов жаңа нысанның пайдалануға берілуіне риза екенін білдірді.
«Кешкі уақытта достарымызбен келіп, футбол ойнаймыз. Алаң өте сапалы жасалған, көңілімізден шықты. Спорт – денсаулық кепілі. Сондықтан осындай пайдалы нысандардың бой көтеруі біз үшін үлкен қуаныш», — деді ол.
Еске сала кетейік, бұған дейін Қонаев қаласында жаңа сквердің салынып жатқаны хабарланған болатын.
