Аталған мәселеге байланысты қала әкімі Нұрлан Құматаев тұрғындарға қызмет көрсетуші «Қапшағай АТО» ЖШС мамандарымен басқосу өткізді. Жиында ол қоғамдық көлік мәселесін басты назарға алып, тиісті шараларды қабылдайтынын айтты.
Ал қалалық автопарктің иесі Біржан Чимчиков өткен жылы қарашада балансқа берілуі керек болған 8 автобустың неліктен әлі қолданыста жоқ екенін түсіндірді.
«2022 жылы 8 автобусты Bank CenterCredit банкінен 250 млн теңге несие алып, сатып алмақ болғанбыз. Ол үшін меншікте бар жылжымайтын мүліктің көбін кепілдікке де қойдық. Дегенмен, кей құжаттар дәл уақытында реттелмей, несие алу кейінге шегерілді. Қаңтар айының аяғы мен ақпан айының басында бұл мәселе шешіліп, 8 автобус қолданысқа беріледі деп жоспарлап отырмыз», — деді Біржан Чимчиков.
Оның айтуынша, министрлікке жолданған 100 миллион теңге субсидия бөлу туралы өтініш те қарастырылып жатыр. Егер жауапты министрлік ақша бөлсе, қосымша автобустар сатып алынады.
Айта кетейік, қазіргі таңда автопарктің балансындағы 19 автобустың төртеуі жөндеуден өтіп жатыр. Ауа райының қолайсыздығына байланысты бүгін тағы 2 автобус істен шықты. 13 қаңтар күні №4 бағытта – 5, №7-де – 4, №2-де – 3 автобус қызмет көрсетіп жатыр. №4 бағыттың жүру интервалы – 10 минут, №7 – 15 минут, №2 – 30 минут.
