Экономика және қаржы бөлімі таратқан деректерге сәйкес, жергілікті бюджетке 44,5 млрд теңге түскен. Бұл өткен жылдың сәйкес кезеңімен салыстырғанда 3,4 млрд теңгеге көп немесе 116,6 пайыздық өсімді құрайды.
Өңірдің өнеркәсіп өнімдерінің жалпы көлемі 67,7 млрд теңгеге, ал негізгі капиталға салынған инвестициялар 96,7 млрд теңгеге жетті. Сауда саласы да тұрақты дамуда: бөлшек сауда айналымы 38,2 млрд теңге, көтерме сауда айналымы 20,9 млрд теңге болды.
Жұмыспен қамту саласында 2377 тұрғын еңбекке орналасуға өтініш білдіріп, олардың 662-сі тұрақты жұмысқа орналастырылды. Жалпы жұмыспен қамту деңгейі 27,9 пайызды, ал ресми тіркелген жұмыссыздар саны 1180 адамды құрады.
Ауыл шаруашылығы саласында да өсім байқалады — өнім көлемі 14,4 млрд теңгеге жетті. Негізгі көрсеткіштер бойынша:
жылқы саны – 16,1%-ға,
ет өндіру – 15,1%-ға,
сүт өндіру – 8,6%-ға,
жұмыртқа өндірісі – 27,2%-ға артқан.
Биыл ауыл шаруашылығы дақылдарының егіс көлемі 11 769 гектарды қамтыды.
Құрылыс саласында 9 айдың ішінде 36,1 мың шаршы метр тұрғын үй пайдалануға берілді. Жалпы құрылыс жұмыстарының көлемі 17,4 млрд теңгеге жетті.
Қонаев қаласы әкімдігі бұл көрсеткіштер қаланың әлеуметтік-экономикалық дамуының тұрақтылығын және негізгі салалардағы оң серпіннің сақталғанын атап өтті.
Мамандардың айтуынша, инвестициялық белсенділік пен өндіріс көлемінің артуы қала экономикасының болашағына сенім ұялатып отыр.
