Экономика және бюджеттік жоспарлау басқармасының басшысы Асылан Ораздың мәлімдеуінше, 2023 жылға арналған облыс бюджетінің жобасы – 743,5 млрд теңге.
«Шығынның ең көп үлес салмағы әлеуметтік салаға жұмсалады – 471 млрд тг (63,4%), тұрғын үй-коммуналдық шаруашылыққа – 69,8 млрд тг (9,4%), ауыл шаруашылығы – 46,3 млрд тг (6,2%), көлік және коммуникация – 36,1 млрд тг (4,9%), басқа бағыттарға — 120,3 млрд тг (16,2%)», — деді Асылан Ораз.
Атап айтқанда, әлеуметтік сала бойынша қомақты қаражат әдеттегідей білім саласын дамытуға бөлінді – 386,3 млрд тг, денсаулық сақтау саласына бұл жолы – 21,7 млрд тг, әлеуметтік көмек және қамсыздандыруға – 35,2 млрд тг, тұрғын үй-коммуналдық шаруашылық мәселелерін шешуге – 69,8 млрд тг, көлік және коммуникация – 36,1 млрд тг, мәдениет, спорт, туризм салаларына және халықты ақпаратпен қамту үшін – 27,8 млрд тг қарастырылған. Ауыл шаруашылығын жетілдіруге – 46,3 млрд тг, отын-энергетика кешені және кен өндіру саласына – 10 млрд тг жұмсалмақ.
Өңірдің бас экономисті Асылан Ораз бұл қаражат негізінен облыс әкімінің халықпен кездесуінде көтерілген мәселелерді шешуге жұмсалатынын айтты.
«Үш ауысымды мектептерді жою, тұрғын үймен қамтамасыз ету, суару каналдарын жөндеу, елді мекендерді газдандыру және сумен жабдықтау, жол инфрақұрылымын дамыту — басым бағыттар», — дейді ол.
Айта кетейік, облыс бюджетіне түскен кірістің негізгі үлесі салықтан құралған — 441,1 млрд тг (99,1%). Сонымен қатар, республикалық бюджеттен мемлекеттік бағдарламалар мен ұлттық жобаларды Алматы облысы бойынша іске асыру үшін — 90,2 млрд тг қарастырылған.
