Құрылыс басына жиналған тұрғындардың айтуынша, Бесағаштағы «Time group construction» ЖШС салып жатқан «Нұрия» көпқабатты тұрғын үй кешенінің аумағына әлеуметтік нысандар салынуы керек болған. Алайда, биыл құрылысшы компания 16 көпқабатты тұрғын үйдің іргетасын қалап бастаған.
«Мұнда 2018 жылдан бастап тұрамыз. Жаңа мектеп, емхана, балабақша салынады деп үміттенген едік, сеніміміз селге кетті. Қазіргі таңда 9 қабатты 16 тұрғын үйде 5000 адам мекен етеді. Ал сол жағымыздағы 3,2 га болатын жерде мектеп бой көтеруі тиіс еді», — деді облыс әкіміне шағымданған тұрғын.
Наразы топтың мұң-мұқтажын тыңдаған облыс әкімі мәселенің жай-жапсары тексеріліп, жүйелі шешім қабылданғанша құрылыс тоқтатылатынын айтты.
«Тұрғын үй халыққа ыңғайлы, бар жағдайы жасалған болмаса, не үшін салынады? Мәселе одан ары ушығып кетпей тұрғанында жоба қайта қаралады», — деді Марат Сұлтанғазиев.
Өңір басшысының барған екінші нысаны — «HAYAT APARTMENTS» көпқабатты тұрғын үй кешені. Мұндағы 5 жарым гектарға жуық аумақта 9 қабатты 29 блокты 1050 пәтерлі тұрғын үй кешенінің құрылысы жүріп жатыр.
Облыс әкімімен тілдесуге келген тұрғындардың сөзіне сүйенсек, құрылыс компаниясы қауіпсіздік ережелерін сақтап жатқан жоқ.
«Бұл жерде қалайша 9 қабатты үй салады? Қазған жерден су шығып жатыр. Келешекте жер асты суының көтеріліп, үйлердің қабырғасы қақырамауына кім кепіл? Оның үстіне, биік үйлер жер үйлерді қалқалап, күн түсірмейтіндей салынып жатыр. Бұл мәселені айтып, бармаған жер, баспаған тауымыз қалмады», — деді тұрғындар.
Өңір басшысы Марат Сұлтанғазиев болса шағымданған азаматтарды келесі апта Қонаев қаласында жеке қабылдап, мәселені егжей-тегжейлі қарайтынын, егер компания жұмысының заңсыз екені анықталса тиісті шара қолданатынын айтты.
