Жобаның негізгі мақсаты — тұрғын үйдің қолжетімділігін арттыру, азаматтардың өмір сүру сапасын жақсарту және әлеуметтік қолдауды қажет ететін топтарға көмек көрсету.
Пәтер иелерінің қатарында тек Іле ауданының тұрғындары ғана емес, сондай-ақ Талғар, Еңбекшіқазақ, Кеген, Жамбыл, Ұйғыр, Қарасай аудандары мен Қонаев және Алатау қалаларының тұрғындары да бар. Бағдарламада әлеуметтік жағынан осал азаматтарға, жетім балалар мен ата-анасының қамқорлығынсыз қалған жандарға, мемлекеттік және бюджеттік ұйым қызметкерлеріне, көпбалалы отбасыларға басымдық берілген.
Іле ауданының әкімі Қайыржан Жақсымбетовтің айтуынша, тұрғындарды баспанамен қамту — мемлекеттік саясаттың басым бағыттарының бірі.
«Іле ауданы бойынша тұрғын үй кезегінде 5 443 адам тіркелген. Оның ішінде көпбалалы отбасылар — 1 878, әлеуметтік жағынан осал топтағы азаматтар — 1 993, жетім және ата-анасының қамқорлығынсыз қалған балалар — 807, бюджеттік ұйым қызметкерлері — 765 адам. 2025 жылы әлеуметтік осал топтағы азаматтарды баспанамен қамту үшін 269 үй мен пәтер сатып алынды. Ал биыл Өтеген батыр ауылында 72 пәтерді осы тұжырымдама аясында беру және әлеуметтік осал топтағы азаматтарға қосымша 36 пәтер сатып алу жоспарланып отыр», — деді аудан әкімі.
Жаңа пәтерге қол жеткізген тұрғындардың бірі Сәрсенгүл Назарбаева көпбалалы ана ретінде үй кезегінде тұрғанын айтады.
«15 жыл бойы сабырмен күтіп, өз баспанама қол жеткіздім. “Отбасы банк” арқылы 5 пайызбен 14 жылға несие алдық. Ай сайын 130 мың теңге, кейін 123 мың теңге төлейтін боламыз. Төрт қызым мен бір ұлым бар, сондықтан үш бөлмелі пәтер бұйырды. Пәтердің сапасы көңілімізден шықты. Қолдау көрсеткен әкімдікке алғысым шексіз», — деді ол.
