Жобаның жалпы құны 1,4 миллиард теңгені құрайды. Оның аясында 21,5 шақырым су құбыры тартылып, екі резервуар, сондай-ақ тереңдігі 220 метрге жететін екі артезиандық ұңғыма және зертхана салынды.
Ауызсу беру 2025 жылдың тамыз айында басталып, құрылыс-монтаждау жұмыстары қараша айында толық аяқталған. Мамандардың айтуынша, жүйе болашақта тұрғындар саны 30 пайызға дейін артқан жағдайда да елді мекенді сумен толық қамтамасыз етуге қауқарлы.
Айта кетейік, бұған дейін әрбір үйде тереңдігі шамамен 35 метр болатын жеке ұңғымалар болған. Алайда ол судың ішуге жарамсыздығына байланысты тұрғындар ауызсуды сырттан тасып пайдалануға мәжбүр болған.
Іле аудандық тұрғын үй-коммуналдық шаруашылық және тұрғын үй инспекциясы бөлімінің басшысы Ғазиз Алтайұлының айтуынша, 2025 жылы аудан аумағында ауызсу жүйесінің 55,2 шақырымы жаңадан салынып, тағы 10 шақырымы жаңғыртылған.
Сонымен қатар Ащыбұлақ ауылдық округіне қарасты Көкқайнар ауылында да ауызсу жүйесін салу бойынша жобалық-сметалық құжаттама әзірленіп, мемлекеттік сараптаманың оң қорытындысы алынған. Жобаға сәйкес 22 шақырым су құбыры жүргізіліп, 1100-ден астам үй орталықтандырылған ауызсумен қамтылады.
