Алғаш болып пікір білдірген ақтөбелік әріптес — жергілікті медиа холдинг директоры Раукен Отыншин Алматы облысының туристік әлеуеті зор екенін айтты.
«Қазақстанда туризм саласы кенжелеп тұрғаны жасырын емес. Оның үстіне, туристік орындар аздау, бар болғанның күннің өзінде, қазақстандықтар елімізді аралай бермейді. Десе де, біз осы форумның аясында Түргеннің төріне, Көлсай көліне, Шарын шатқалына барып, облыстың туристік әлеуеті зор екеніне көзімізді жеткіздік. Көрікті жерлерді аралап, көзайым болдық. Мұндай шаралар көптеп ұйымдастырылсын деу артықтау, бірақ, тілшілердің бас қосып тұруы керек-ақ», — деді медиа холдинг басшысы.
Раукeн Отыншиннің сөзінше, туристік инфрақұрылымды дамыту керек. Әйткенмен, кейде байланыссыз жерге кетіп, табиғатпен тілдескен де адамға оң әсер етеді, рухани демалдырады.
«Облыс әкімі инфрақұрылымды дамыту қажет деп отыр. Ол үшін тез іске кірісу керек. Дегенмен, мұнда мына бір мәселені ескеру де қажет секілді — Монғолияның қу даласына, ол жерде ғаламтор да, байланыс та жоқ, демалушылар ағылып жатады. Қазіргі жаһандану заманында бар ақпараттан, әлеуметтік желіден бір уақыт болса да, демалған жөн. Жалпы Қазақстан аумағында тарихи орындар да, табиғаты тамаша да жерлер көп. Әлі де туризм дамуына күш салу керек. Ол мәселелер бүгін талқыланады. Ауқымды шараны ұйымдастырушыларға, облыс әкімдігінің баспасөз қызметіне алғысымды білдіремін», — деді ақтөбелік әріптес.
Сондай-ақ қызылордалық әріптес Мақсұт Ибрашев та пікірін білдірді.
«Үйге жақсы әсер алып қайтып бара жатырмыз. Әрине, туризмнің медиасыз дамымайтыны, алға қадам баспайтыны сөзсіз. Алматы облысына 100-ден аса журналист келсе, жүзден астам пікір болады, олар түрлі ақпарат таратады. Бұл өз кезегінде облыстың әлеуетін арттырады. Осы орайда, туризмді дамыту үшін ұлттық дәстүрлерімізді, тағамдарымызды, салт-санамызды насихаттай отырып ілгері жылжытуымыз қажет екенін айта кеткен жөн. Кеше бұл тәжірибе Көлсай көлдері аумағында қолданылатынын білдік. Енді туризм туралы жазған журналистер арасында конкурс өтеді. Ол бастаманы облыс әкімі де қолдады», — деді Мақсұт Ибрашев.
Ал Созақ ауданынан ат басын бұрып, форумға қатысқан Сәрсенбек Теңізбаев болса, Түркістан облысы мен Алматы облысының айырмашылығы ауа райында ғана екенін байқапты. Айтуынша, халықтың әлеуметтік жағдайы да, тыныс-тіршілігі де бірдей.
«Созақ ауданы 320 әулиелі мекені бар болғанымен ерекшеленеді. Қазақстанның түкпір-түкпірінде мұндай тарихи орындар көп қой. Бізде де туризм саласын дамыту туралы түрлі семинарлар өтеді. Бірақ, Халықаралық деңгейде форум ұйымдастырылған емес. Түркістан — екінші Мекке саналады. Облыс орталығы болғалы бері құрылыс қарқын алып, қалаға ерекше өң кірді, демалушылар саны жылдан-жылға көбейіп жатыр. Қонаев қаласы да сондай қарқынмен дамиды деген ойдамыз», — деді «Созақ үні» газетінің бас редакторы.
Бұдан бөлек, журналистер өздерінің Инстаграм және фейсбук парақшаларында түрлі ақпар жариялап жатыр.
