Алматы облысы, Еңбекшіқазақ ауданында ауыл шаруашылығы саласы үшін стратегиялық маңызы зор өндіріс орнының құрылысы басталды. Жаңа зауытты толықтай қазақстандық инвесторларға тиесілі «Qazaq Global Food JV» ЖШС іске асыруда. Бұл жоба өңір экономикасына серпін беріп, жергілікті фермерлерді қолдауға бағытталған.
Кәсіпорын жергілікті шаруалардан алма түсімі мен қызанақты сатып алып, оларды қайта өңдеу арқылы алма концентраты мен томат пастасын өндіреді. Дайын өнімнің 100%-ы оффтейк келісімдері негізінде экспортталады.
Бұл мақсатта жоба ұйымдастырушылары Түркияның жетекші компанияларының бірі Göknur Gida-мен ұзақ мерзімді әріптестік орнатты. Шетелдік серіктес қазақстандық өнімді экспорттау бойынша стратегиялық оператор ретінде әрекет етеді. Мұндай келісім жергілікті ауыл шаруашылығы өнімдерінің халықаралық нарықтарға кедергісіз шығуына мүмкіндік береді.
Зауыттың іске қосылуы:
- Жергілікті фермерлер үшін тұрақты өткізу нарығын қамтамасыз етеді;
- Жаңа жұмыс орындарын құрады;
- Азық-түлік қауіпсіздігін нығайтады;
- Өңір экономикасына жоғары қосылған құн әкелетін өнімдер шығаруға жағдай жасайды.
Президент Қасым-Жомарт Тоқаев агроөнеркәсіп кешенінің ел экономикасындағы маңызына тоқталып, бұл сала экономикалық өсудің негізгі қозғаушы күшіне айналуы тиіс екенін атап өткен болатын. Жаңа өндіріс осы стратегиялық бағытқа толықтай сәйкес келеді.
Жобаның көрсеткіштері
- Инвестиция көлемі: шамамен 20 млн АҚШ доллары немесе 9,5 млрд теңге;
- Іске қосу мерзімі: 30 сәуір 2026 жыл;
- Өндірістік қуаттылық:
- Алма концентраты – жылына 40 000 тонна;
- Томат пастасы – жылына 30 000 тонна;
Орналасқан жері: Алматы облысы, Еңбекшіқазақ ауданы, Тескенсу ауылдық округі.
Жобаның жүзеге асуы Қазақстанның агроөнеркәсіптік әлеуетін арттырып қана қоймай, өңірлік дамудың жаңа кезеңін бастайды. Жергілікті шаруалардың өнімдері енді халықаралық нарықтарға жол тартып, отандық брендтің беделін күшейтпек.
