Неліктен Еңбек күні маңызды?
Еңбек күні – ең алдымен, қарапайым еңбектің қадірін дәріптейтін, еңбек адамының қоғамдағы мәртебесін көтеретін мереке. Бұл күнде қоғамға сүбелі үлес қосып жүрген жұмысшылар, еңбек әулеттері мен жас мамандар лайықты марапатқа ие болады.
19 қыркүйекте Алматы облысында Еңбек күніне арналған салтанатты шара өтті. Талғар ауданындағы Мәдениет үйінде ұйымдастырылған мерекеде «Еңбек жолы», «Парыз – 2025» байқауларының жеңімпаздары, еңбек ардагерлері және жұмысшы мамандықтарының үздік өкілдері марапатталды. Оларға дипломдар, алғыс хаттар, облыс әкімі атынан алғыс білдіретін хаттар және ақшалай сертификаттар табысталды.
Адал еңбек – ұрпаққа үлгі
Іс-шара барысында үздік еңбек әулеттері марапатталды. Соның ішінде Іле ауданындағы «Алель Агро» АҚ-да еңбек етіп келе жатқан Әбдірахмановтар әулеті бар.
«Еңбек – біздің әулет үшін басты құндылық. Әкеміз бен аталарымыз еңбекқорлықты өмірлік ұстаным етіп, бізге үлгі көрсетті. Біз қазір сол жолды жалғастырып келеміз. Осындай марапат – тек біздің әулетімізге емес, барлық еңбек адамына көрсетілген құрмет деп білемін», – деді Әбдірахмановтар әулетінің үлкені.
Бұл сөздер еңбек әулеттерінің ұрпақтар сабақтастығын сақтап, адал еңбекті ұлықтап келе жатқанын дәлелдейді.
Салтанатта Талғар ауданы әкімінің орынбасары Айбек Бидаев еңбек адамдарын құттықтап, оларға алғыс айтты.
«Баршаңызды еңбек пен бірліктің мерекесі – Еңбек күнімен шын жүректен құттықтаймын! Бұл мереке – маңдай терімен ел дамуына үлес қосып жүрген әрбір азаматтың күні. Бүгінгі марапат иелері – өз еңбегімен өңірдің дамуына зор үлес қосқан жандар. Сіздердің еңбектеріңіз – жас ұрпаққа үлгі, ал жетістіктеріңіз – қоғамымыздың өркендеуіне жол ашатын құндылық», – деп атап өтті.
Қоғам үшін ортақ құндылық
Мереке аясында «Керуен» жобасы, бос жұмыс орындары жәрмеңкесі, студенттердің флешмобы мен кәсіби шеберлік сабақтары ұйымдастырылды. Мемлекеттік грант иегерлері өз бизнес-жобаларын таныстырып, еңбек нарығына жаңа серпін берді. Жалпы шараларға 400-ден астам адам қатысып, 500-ге жуық бос жұмыс орны ұсынылды.
Бұл бастамалар еңбек адамының қоғамдағы мәртебесін көтеріп қана қоймай, жастарға жаңа мүмкіндіктер ашты, кәсіби бағдар берді және еңбек нарығындағы сұраныс пен ұсынысты үйлестіруге нақты үлес қосты.
Еңбек күні – ең алдымен, еңбек адамына тағзым ету күні. Бұл мереке арқылы әрбір жұмысшының еңбегін бағаланып, олардың қоғам дамуына қосқан үлесі мойындалады. Адал еңбегімен елге үлгі болған жандар – мемлекеттің нағыз тірегі.
