Бұл байқау үш номинация бойынша өтті:
• Үздік еңбек әулеті
• Жұмыс істейтін жастардың үздік тәлімгері
• Өндірістің үздік жас маманы.
Осы номинацияларға сәйкес, биыл Кеген ауданындағы Мойнақ ГЭС-те қызмет ететін Думан Салимахунов «Жұмыс істейтін жастардың үздік тәлімгері» атанды.
Думан Салимахунов 1981 жылы ақпаннаның 22-сі күні Кеген ауылында дүниеге келген. 2006 жылы Алматыдағы Энергетика және байланыс университетін электроэнергия және электростанция мамандығын тәмамдаған.
Ол 2009 жылы ГЭС-те құрылыс қарқынды жүріп тұрғанда жұмысқа кірген. Арада екі жыл өткен соң орталық басқару пунктінде ауысым бастығы лауазымына қабылданған. 2011 жылы Думан Салимахунов Қытайға барып, тәлім алып, мамандармен тәжірибе алмасып келген. Себебі, осы ГЭС-тің баламасы күншығыс елінде орналасқан. Сонымен қатар маман Қапшағай ГЭС-те іс-тәжірибеден өтіп, білімін жетілдірген.
«Негізінен ГЭС-тің тоқтаусыз жұмыс жасауын қадағалап отырамын. Электроэнергияның бастапқы өндіріліп шығатын жері болғандықтан, бұл жер маңызды стратегиялық нысанның қатарына кіреді», — дейді маман.
Сәйкесінше, мұнда қауіпсіздік ережелері қатаң сақталуға тиіс әрі жауапкершілік те жоғары. Бірақ, Думан Салимахунов тәртіпке бағыну, белгілі ережелермен өмір сүру — қалыпты дағдыға айналғанын алға тартып отыр.
«Құрылғылардың барлығы заманауи үлгіде жасалған, жаңартылған. Жұмысымыз — таза, тыныш, жинақы. Бұл жерде қызмет еткен өзіме ұнайды. Өйткені, мен отбасыммен ГЭС-тің маңынан салынған Энергетиктер ауылында тұрамын. Бала-шағамыздың мектепке барып-келуі, балабақша, қыстыгүні үйдің жылуы, қызметкерлердің жұмысқа тасымалы — бүкіл мәселеміз шешілген. Жұбайым екеуміз 1 қыз, 2 ұл тәрбиелеп отырмыз», — деді Думан Салимахунов.
Сондай-ақ ол жас мамандарды жетектеп жүріп, тәрбиелеп, әр агрегаттың, құрылғының қалай жұмыс істейтіні жайлы үйреткенін айтты. Осы уақытқа дейін ол 15-тен астам маманға білім беріп, оларды емтиханнан өткізген.
Думан Салимахунов ұжымның ортасында біліктілігімен, алғырлығымен көзге түскен. Әріптестерінің арасында сыйлы, аса құрметке ие. Оның мұндай қасиеттері жайлы қызметтес достары сөз етті.
