Полиция мәліметінше, өңір жолдарында аталған жүйемен жабдықталған патрульдік автокөліктер қызмет атқарып жүр. Ekin-Patrol жүйесі толықтай автоматты режимде жұмыс істейді және полиция қызметкерінің тікелей қатысуын қажет етпейді. Ол жол қозғалысы ережелерінің түрлі бұзушылықтарын тіркеп, көлік құралдарының мемлекеттік тіркеу нөмірлерін автоматты түрде таниды. Сонымен қатар дерекқорлар арқылы көліктің қарызы, тыйым салынуы немесе іздеуде болуы секілді мәліметтерді тексереді.
Аталған жүйе құқықбұзушылықтарды қарсы бағытта да, бір бағытта да қозғалып келе жатқан көліктерден тіркей алады. Қазіргі таңда Алматы облысының жолдарында жасырын патрульдерді қоса алғанда, 23 патрульдік автокөлік жұмылдырылған.
Құқық қорғау органдарының мәліметінше, бұл көліктердің негізгі міндеті — жол қозғалысы ережелерінің өрескел әрі жүйелі түрде бұзылуын анықтау, сондай-ақ жол-көлік оқиғаларының алдын алу. Жыл басынан бері өңірде Ekin-Patrol жүйесі орнатылған патрульдік автокөліктердің көмегімен 46 мыңнан астам құқықбұзушылықтың жолы кесілген.
Алматы облысы полиция департаменті өкілдері аталған шаралар тек жол қозғалысына қатысушылардың қауіпсіздігін қамтамасыз етуге және апаттылық деңгейін төмендетуге бағытталғанын атап өтті. Ведомство жүргізушілерді жолда мұқият болуға және жол қозғалысы ережелерін қатаң сақтауға шақырды.
