Реаниматолог пен мейіргер пациенттің туыстарының шабуылынан ауыр жарақат алды.
«Осы әрекетке құқық қорғау органдары тарапынан тиісті баға беріліп, дәрігерлерді соққыға жыққан адамдар заң талаптары бойынша жазалануға тиіс. Дәрігерлерге жасалған мұндай қаскүнемдік шабуыл, жағдайы ауыр пациенттерге медициналық көмек көрсететін аурухананың жұмысына араласуға мүлдем жол берілмейді және адамгершілікке жатпайды», — деп атап өтті министрліктен.
Ведомство мәліметінше, пациенттер мен дәрігерлердің қауіпсіздігі, науқастарға медициналық көмек көрсету үшін жағдай жасау әрқашан бірінші орында.
«Басты міндет — зардап шеккен дәрігердің және басқа қатысушылардың қауіпсіздігін қамтамасыз ету, бүкіл күш-жігерді зардап шеккен медицина қызметкерлерінің өмірі үшін күреске бағыттау, ал медициналық ұйымда басқа шұғыл пациенттерге көмек көрсету үшін қауіпсіз жағдай жасау. Әріптестеріміздің тезірек сауығып кетуіне тілектеспіз», — делінген хабарламада.
Денсаулық сақтау министрлігі медицина қызметкерлерінің міндетін орындау кезінде оларға зорлық-зомбылық жасалған жағдайда қылмыстық жауапкершілікке тартылып, медицина қызметкерлерін құқықтық қорғау, қауіпсіздік және мәртебесін нығайту бастамасын көтереді.
Заңнамаға енгізілген өзгерістер Парламент Мәжілісінде қаралады.
Бұған дейін Талғар аудандық ауруханасында әкесінің қайтыс болғанын естіген ұлдары медицина қызметкерлеріне күш көрсетіп, соққыға жығып, марқұмның денесін алып кеткенін жазған болатынбыз.
