Азат есімді азаматтың айтуынша, Бөлексаз ауылында ауыз сумен қамтамасыз ету бойынша күрделі жөндеу жұмыстары осыдан 2 жыл бұрын аяқталуы керек болған. Алайда мердігер компанияның жауапкершіліксіздігіне байланысты бұл құрылыс әлі күнге дейін жүріп жатыр.
«Осы мәселеге араласып, шешімін тауып беруіңізді сұраймыз. Ауыз су расымен де күрделі мәселе әрі халықтың наразылығын тудырып отыр. Ақша бөлініп тұрса, су неге халыққа берілмей жатыр? «Жұмыстың 95 пайызы аяқталды» дейді жауапты мамандар. Олай емес екенін сіз де, біз де біліп отырмыз ғой. Бұған қоса құрылыс туралы бейнежазба да әлеуметтік желіде тарады», — деді тұрғын.
Өз кезегінде облыс әкімі мердігер компанияның ісі сотта қаралып, тиісті үкім шыққанын айтты.
«Бағана баяндамада атап өткендей, тұрғындарды толғандыратыны — су мәселесі. Соттың шешіміне сәйкес, мердігерлер жұмысты маусым айының соңына дейін бітіруі қажет. Сондай-ақ компаниямен құқық қорғау органдары жұмыс жасайтын болады», — деді Марат Сұлтанғазиев.
Тұрғындармен кездесуге қатысқан мердігер компанияның өкіліне облыс әкімі белгіленген уақытта жұмыс аяқталмаса, тағы да шаралар қолданылатынын жеткізді.
