Аталған басқарманың басшысы Нұрбақыт Теңізбаевтың айтуынша, облыста спорт инфрақұрылымын жетілдіру арқылы бұқаралық спортты дамыту қажет. Ол үшін 2023 жылдың 1-тоқсанында Еңбекшіқазақ ауданы Ащысай ауылы мен Райымбек ауданы Сарыбастау ауылында спорт кешендерінің құрылысы басталады деп жоспарланып отыр. Ал жыл соңына қарай Қонаев қаласы мен Жамбыл ауданы Тарғап ауылында кешендердің құрылысы басталмақ.
«Қазіргі таңда облыс бойынша 2 дене шынықтыру-сауықтыру кешені мен 4 спорт кешенінің құрылысы жүріп жатыр. Жоғарыда аталған жоспардан бөлек, биыл Шеңгелді, Заречный ауылдары және Іле ауданы Байсерке ауылына спорттық нысан тұрғызу бойынша жобалық-сметалық құжаттың (ЖСҚ) қорытындысы алынады», — деді Нұрбақыт Теңізбаев.
Басқарма басшысының мәліметінше, биыл 8 спорт нысанының ЖСҚ әзірлеуге қаржы бөлінді. Олар:
- 3 нысан — Еңбекшіқазақ ауданы Бәйдібек би, Қазақстан, Тескенсу ауылдары;
- 1 нысан – Іле ауданы Түймебаев ауылы;
- 2 нысан – Райымбек ауданы Текес, Қайнар ауылдары;
- 1 нысан – Кеген ауданы Жалағаш ауылы;
- 1 нысан – Қарасай ауданы Шамалған ауылы.
Сондай-ақ басқарма басшысы жергілікті спорт бөлімдерінің аудан және ауылдарда спорт алаңын салу жұмысын ілгерілету керек екенін айтты.
«Тағы айта кететін мәселе – аудандық спорт бөлімдері жергілікті әкімдік тарапынан әр ауданда, ауылдарда спорт алаңдарын салу үшін жұмыс жасауларыңыз қажет», — деді Нұрбақыт Теңізбаев.
