«Талғар ауданы бойынша 48 елді мекен бар, оның 31-і (64,5%) газдандырылған. Биыл Еламан, Көктал және Қайнар ауылдарында биылғы жылы газдандыру жұмысы басталды», — деді басқарма басшысының орынбасары Айдар Бошкулов.
Еламан ауылына газды «Алматы Production Construction & Invest» ЖШС мердігерлік ұйымы тартады. Оған тапсырысты облыс әкімдігінің жауапты басқармасы берді. Шартқа 2022 жылғы 19 мамырда қол қойылды. Жұмыс құны — 147,7 млн. теңге.
Ал Көктал ауылын газдандыруды «Ремстрой» ЖШС жүргізеді. Жауапты басқармамен екіжақты шарт 2022 жылдың 27 шілдесінде жасалды. Газ тартудың құны — 161,2 млн. теңге.
Қайнар ауылына газ желісін «ТеплоЭнергоСтрой» ЖШС тартады. Шарт 2022 жылдың 29 шілдесінде жасалды. Жұмыс құны — 112,8 млн. теңге.
Егер бар жұмыс жоспардағыдай жүзеге асса, жыл соңына қарай газ желісі қолданысқа беріледі.
Сонымен қатар ол 9 ауылда (Жаңалық, Дәулет, Қызыл Ту, Арқабай, Төңкеріс, Кіші Байсерке, Нұра, Өстемір, Туғанбай ауылдары) жобалық-сметалық құжат (ЖСҚ) әзірленіп жатқанын айтты.
Ал 5 ауыл бойынша (Достық, Сақтан, Тереңқара, Каменское плато, Қаратоған) ЖСҚ әзірлеу қажет. Аталған елді мекендер бойынша облыстық энергетика және ТҮКШ басқармасына жоба әзірлеуге өтінім хат жолданды.
Бұдан бөлек, басқарма басшысы орынбасарының айтуынша, алдағы уақытта газға қосылу құны елдегі инфляцияға байланысты өзгереді.
Айта кетейік, аудан бойынша газ желілеріне «ҚазТрансГаз Аймақ» АҚ филиалы, «Тәуекел-Н-Алғабас» ЖШС және «Жетісу Газ Кубыр» ЖШС қызмет көрсетеді. Желілердің жалпы ұзындығы — 925,2 шақырым. Қосылу құны 120 000-500 000 теңге аралығында. Қазіргі таңда ауданда 44 мың тұрғын үйдің 32 мыңы газдандырылған. Сондай-ақ 252 көппәтерлі үйдің 142-сі табиғи газға қосылған.
Посмотреть эту публикацию в Instagram
