«Бұл жоба бойынша облысқа 9 млрд. теңгеге жуық қаражат бөлінді. Өңірдегі бірқатар ауылда бағдарлама пилоттық режимде іске аспақ. Біз өз тарапымыздан нақты шаруашылықтарға тез арада қаржыны берудің негізгі жолдарын қарастырып қойдық», — деді Алматы облысының әкімі Марат Сұлтанғазиев.
Өз кезегінде Алтай Көлгінов республика тұрғындарының жартысы ауылдық жерде тұратынын, соған орай, мемлекет басшысы сайлаудан кейін «Ауыл аманаты» жобасын іске қосқанын айтты.
«Бұл бағдарламаның негізгі мақсаты — азаматтарға өз кәсібін ашуға мүмкіндік беру. Жобаны жүзеге асыру үшін республика бойынша 1 тлрн. теңге қаражат бөлінді», — деді Алтай Сейдірұлы.
ҚР Премьер-Министрі орынбасарының мәліметінше, «Ауыл аманаты» шеңберінде шаруаларға 8 млн. 600 мың теңгеге дейін 2,5% қаржы беріледі. Егер шаруалар бірігіп, кооперация құрса, 27 млн. теңгеге дейін ақшалай қолдау алуға мүмкіндік бар. Сондай-ақ олар қажетті техника алатын болса, негізгі сомасының 50 пайызына мемлекет тарапынан субсидия беріледі.
«Алматы облысы ауыл шаруашылығына қолайлы аймақ. Осы мүмкіндікті құр жібермей әрекет етіңіздер. Өйткені пайыздық мөлшерлеме төмен. Басты шарт кепілге қоятын мүлкіңіз болу керек. Себебі, алған қаражатты мемлекетке қайтарасыздар», — деді Алтай Көлгінов.
Кездесуге келген шаруалар алма бағын салуды, көкөніс өсіру, ірі қара мал басын көбейтуді көздейтіндерін айтты.
ҚР Премьер-Министрінің орынбасары Алтай Көлгінов облыс әкіміне құжаттары талапқа сай келген өтінім берген шаруаларға қаражатты тездетіп беруді тапсырды.
