Мерейтойлық жыл облыс үшін жаңа жобалар мен тың бастамалармен ерекшеленіп отыр.
Басты оқиға ретінде 2025 жылғы 30 мамырда Қонаев қаласында өткен Алматы облысы Қазақстан халқы Ассамблеясының XXX сессиясын атауға болады. Маңызды жиынға облыс әкімі Марат Сұлтанғазиев төрағалық етті. Сессияда ел бірлігі мен этносаралық ынтымақтастықты ілгерілетудің өзекті мәселелері талқыланып, мерейтойлық жылдың мазмұнды бағыттары айқындалды.
Жыл басынан бері өңірде 300-ден астам түрлі форматтағы іс-шара ұйымдастырылып, 40 мыңнан астам адамды қамтыды. Ауқымды шараларға облыстағы 34 этномәдени бірлестіктің мүшелері, Аналар және Ақсақалдар кеңесінің өкілдері, «Ассамблея жастары» ұйымының белсенділері мен медиаторлар қатысты.
Мерейтой жылының тағы бір маңызды бағыты – этносаралық келісімге арналған инфрақұрылымды дамыту. Қонаев қаласы мен Ұйғыр ауданында жаңа Достық үйлерінің құрылысы жоспарланған. Қазіргі уақытта аталған нысандар бойынша жобалық-сметалық құжаттама әзірленуде.
Сондай-ақ, этнос өкілдері тығыз орналасқан Еңбекшіқазақ және Ұйғыр аудандарында Қазақстан халқы Ассамблеясының бөлімшелерін ашу жұмыстары басталды. Бұл бастама Астанада өткен ҚХА-ның XXXIV сессиясында Мемлекет басшысы жүктеген міндеттер аясында жүзеге асуда.
Ассамблея жұмысының ажырамас бөлігі саналатын Аналар кеңесі мен Ақсақалдар кеңесі де белсенді қызмет атқаруда. Облыс бойынша жұмыс істейтін 146 Аналар кеңесі мен 141 Ақсақалдар кеңесі жыл басынан бері 190-нан астам іс-шара өткізіп, 20 мыңға жуық тұрғынды қамтыды. Ал медиация алаңында ұйымдастырылған 36 кездесу 4 мыңнан астам адамды бір үстел басына жинады.
Жастардың бастамаларына да айрықша көңіл бөлінуде. «Ассамблея жастары» қанаты жыл басынан бері 49 жобаны іске асырып, 6 мыңнан астам жасты қамтыған.
Жыл соңына дейін өңірде этносаралық келісім мен толеранттылықты насихаттауға бағытталған тағы сегіз ірі этномәдени жоба өткізілмек.
«Біздің өңір үшін келісім мен ашық диалог – тек қағидат емес, өмір салтына айналған. Қазақстан халқы Ассамблеясы – бейбітшілік пен бірліктің, мәдени көптүрлілікке деген құрметтің символы. Мерейтой жылы біз тек мәдени шаралармен шектелмей, инфрақұрылымдық жобаларға да ерекше мән беріп отырмыз. Қонаев қаласындағы Достық үйі мен Конгресс-холл – әр этностың мәдениетін құрметтейтін, әр дауысты естіп, қолдайтын қоғам құру жолындағы маңызды инвестиция», – деді Алматы облысының әкімі Марат Сұлтанғазиев.
Бұл бастамалар Қазақстан халқы Ассамблеясының 30 жылдық жетістігін ғана емес, болашақ ұрпаққа берік бірлік пен өзара түсіністіктің үлгісін қалдыруға бағытталған маңызды бағдар екенін айғақтайды.
