2022-2023 жылдары 19 000-нан аса әйелге ЭКО жасалып, олардың 7000-нан астамы жүкті болған. Айта кетейік, эко орталықтарына қаржы міндетті әлеуметтік медициналық сақтандыру жүйесі арқылы төленеді.
Бүгінде елімізде 15 мың ерлі-зайыпты бедеулік диагнозымен есепте тұр. Демек, елімізде әр алтыншы жұп бала сүюді аңсайды.
Елімізде осы бағдарлама іске қосылғалы 5 мың бала дүниеге келген.
Квотаны алу мен тіркелу жолын облыстық денсаулық сақтау басқармасы басшысының орынбасары Лейла Пернебайқызы түсіндірді.
«Әр екінші әйелдің құрсағына сәби бітті. Дегенмен тегін эко жасату мүмкіндігі екі жағдайда ғана берілетінін де айту керек. Еркектік фактор әсер еткенде және әйелде жатыр түтікшесі болмаған жағдайда ғана квотаны алуға мүмкіндік бар», — деді ол.
Экстракорпоральды ұрықтандыру еліміздегі 19 клиникада жүргізіледі. Оның 7-і Алматы қаласында. Алматы облысындағы отбасылар осы клиникалардың көмегімен балалы болуға тырысып жатыр.
«Аңсаған сәби» бағдарламасы жүзеге асырыла бастағалы бері МӘМС есебінен 20 мыңға жуық әйелге экстракорпоральды ұрықтандыру жүргізілген. 2022-2023 жыл аралығында 5 мың нәресте дүниеге келген.
