Қоғамдық қабылдауға кәсіпорынның 40-қа жуық қызметкері қатысып, жалақы, еңбек қауіпсіздігі, медициналық қызмет, жол сапасы, қоғамдық көлік бағыттары мен экологияға қатысты ұсыныс-пікірлерін ортаға салды.
Партия өкілдерінің айтуынша, мұндай қабылдаулар еңбек ұжымдарымен тікелей байланыс орнатып, әлеуметтік мәселелерді жергілікті жерде көтеруге мүмкіндік береді.
«Әрбір ұсыныс пен көтерілген мәселе бойынша тиісті мекемелерге нақты ұсыныстар жолданып, орындалуы партиялық бақылауға алынады. Бұл – халықпен ашық диалогқа бағытталған жүйелі жұмыс», – деді қабылдауды ұйымдастырушылар.
«Фирма БЕНТ» ЖШС директоры әрі бастауыш партия ұйымының төрағасы Дінмұхаммед Күзиев те мұндай форматтың маңызын атап өтті.
«Бүгінгі қабылдауда жұмысшылар еркін пікір білдіріп, өз ұсыныстарын жеткізді. Бұл – формалды емес, шынайы диалог алаңы. Ұжым үшін осындай мүмкіндік маңызды. Бастауыш ұйым төрағасы ретінде мұндай кездесулердің тұрақты болғанын қолдаймын», – деді ол.
Партия алдағы уақытта көшпелі қоғамдық қабылдауларды басқа да өндіріс ошақтарында жалғастыруды жоспарлап отыр. Барлық өтініштер жеке қаралып, бақылауға алынатын болады.
