Алматы қалалық мобилділік басқармасы таратқан мәліметке сәйкес, тау-шаңғы маусымының ашылуына байланысты 26 қарашадан бастап №12 туристік маршрут жұмысы күшейтілді.
«Енді бұл маршрут бойынша 10 минуттық уақыт аралығымен демалыс күндері 20, жұмыс күндері 16 автобус қызмет көрсетеді. Маршрут Алматы-2 темір жол вокзалынан басталып, Абылай хан даңғылымен жоғары көтеріліп, Абай даңғылымен жүріп, Медеу мұз айдынына дейін барады. Медеуден соңғы автобус түнгі сағат 00:30-да шығады», — деп хабарлады басқармадан.
Айта кетейік, кешеден бастап Шымбұлақта тау шаңғысы маусымы ресми түрде ашылды.
Шымбұлақта сейсенбі, бейсенбі және сенбі күндері түнгі уақытта да сырғанауға болады. Демалушылар үшін ұзындығы 25 шақырым болатын түрлі қиындықтағы 14 жол қарастырылған.
