Алматы көпсалалы клиникалық ауруханасына 48 жастағы әйел жамбас аймағындағы ісіну, аяқтағы қоңыр дақтардың пайда болуы және дене температурасының жоғарылауы сияқты шағымдармен жүгінген. Дәрігерлер тексеру барысында илеофеморальды веноздық тромбозды анықтады. Сонымен қатар, зерттеу нәтижесінде іш қуысын толығымен жауып, ішкі ағзаларды қысып тұрған жатыр миомасы анықталды, деп хабарлайды alataunews.kz.
Науқас бірнеше жылдар бойы гинекологқа қаралмаған және ішінің көлемінің ұлғаюына назар аудармаған. Тек денсаулығы айтарлықтай нашарлаған соң ғана медициналық көмекке жүгінген.
Операцияны тәжірибелі гинекологтар Риза Керемқұлова, Ажар Амангелді және Дархан Молдабек міндетті әлеуметтік медициналық сақтандыру (МӘМС) шеңберінде сәтті жүргізді.
«Операция барысында біз салмағы 6 килограмм болатын жатыр миомасын алып тастадық. Сондай-ақ, ішкі ағзаларды босатып, ілеспе жабысқақ түзілімдерді жойдық», – деді гинекология бөлімшесінің меңгерушісі Риза Керемқұлова.
Қазіргі уақытта науқас ауруханадан шығарылып, өзін жақсы сезінеді және қалыпты өміріне оралды.
Алматы көпсалалы клиникалық ауруханасының дәрігерлері әйелдерге жылына 1-2 рет гинекологқа қаралып тұрудың маңыздылығын еске салады. Уақытылы тексеру ауруларды ерте анықтап, асқынудың алдын алуға мүмкіндік береді.
