«ҚазАвтоЖол» ұлттық компаниясы таратқан мәліметке сәйкес, бүгін, 1 қазанда Ақмола, Алматы, Шығыс Қазақстан, Жамбыл, Солтүстік Қазақстан, Абай және Жетісу облыстарында жаңбыр жауып, қар түсуі ықтимал.
«Жүргізушілерге жылдамдық режимін қатаң сақтап, жол қауіпсіздігі талаптарын орындауды және қолайсыз метеожағдайларды ескеруді сұраймыз», – делінген ресми хабарламада.
Синоптиктердің болжамына қарағанда, қыркүйек айының соңында басталған суық ауа райы қазан айының басында да сақталмақ. Қазақстанның басым аумағында түнгі уақытта термометр бағаны -1-6 градусқа дейін төмендеп, күндіз +2…+9 градус аралығында болады деп күтіледі.
Мамандар осындай жағдайларда жолдағы көлік қозғалысы қиындай түсетінін айтып, тұрғындарды барынша сақ болуға шақыруда. Ауа райының құбылмалы сипаты, әсіресе, өңірлер арасындағы күре жолдарда және таулы аймақтарда ерекше сақтықты талап етеді.
Еске сала кетейік, қыркүйек соңындағы қолайсыз ауа райы еліміздің шығысы мен оңтүстігінде алғашқы қардың түсуімен есте қалған болатын. Синоптиктердің айтуынша, биыл күздің алғашқы айлары әдеттегіден салқын өтіп, алдағы күндері де аязды түндер жалғасын табады.
