Іс-шараға Жамбыл ауданының әкімі Нұрлан Ерташ, облыстық Денсаулық сақтау басқармасының басшысы Ержан Сүлейменов және ҚР Парламенті Мәжілісінің депутаты Максим Николаевич Рожин арнайы қатысып, ауыл тұрғындарын қуанышты оқиғамен құттықтады.
Медициналық қосындар Мемлекет басшысының тапсырмасына сәйкес жүзеге асырылып жатқан «Ауылдық денсаулық сақтауды жаңғырту» ұлттық жобасы аясында бой көтерді. Бұл – ауыл тұрғындарына алғашқы медициналық көмекті сапалы әрі уақытылы көрсетуге бағытталған маңызды қадам.
Қазіргі таңда Сауырық батыр ауылында 660 тұрғын бар. Жаңа қосында бір фельдшер мен жарты бірлікке есептелген кіші мейірбике жұмыс істейді. Медициналық пункт күніне 10 адамға дейін қабылдай алады.
Көкдала ауылында салынған медициналық пункттің жалпы құны – 124 млн 240 мың теңге. Мұнда 400-ге жуық тұрғын бар. Медициналық нысанда бір фельдшер жұмыс істейді, ол да күніне 10 адамға дейін қабылдауға қауқарлы.
Бұған дейін ауыл тұрғындары ескі мектеп ғимаратындағы бөлмеде медициналық қызмет алып келген. Енді олар заманауи талаптарға сай жабдықталған жаңа ғимаратта сапалы медициналық көмек алуға мүмкіндік алды.
Жаңа нысандар қажетті инженерлік желілермен, заманауи медициналық құрал-жабдықтармен, диагностикалық, қабылдау және ем-шара кабинеттерімен толық қамтамасыз етілген. Құрылыс жұмыстарын «Техно Снаб 2002» ЖШС жүргізді.
Айта кетейік, Жамбыл ауданында барлығы 16 медициналық нысанның құрылысы жоспарланған. Бұған дейін Айдарлы, Ашысу және Қопа ауылдарында жаңа нысандар пайдалануға берілген. Сауырық батыр мен Көкдала ауылдарындағы қосындармен бірге жалпы саны 5 медициналық нысан халық игілігіне тапсырылды. Қалған 11 нысанды 2025 жылдың тамыз айының соңына дейін іске қосу жоспарланып отыр.
